சிவகார்த்திகேயனின் மிகையில்லாத நடிப்பு ரசிக்கப்பட்டதா? - டாக்டர் திரை விமர்சனம்
கதைப்படி ராணுவத்தில் டாக்டராக பணிபுரிந்து கொண்டிருக்கிறார் சிவகார்த்திகேயன். இவர் ஒரு நிகழ்ச்சியில் நாயகி பிரியங்கா மோகனை சந்தித்து காதல் வயப்படுகிறார். இவர்கள் திருமணம் செய்வதற்கு முன் குணாதிசிய வேறுபாடுகளால் பிரிந்து விடுகிறார்கள். இந்நிலையில், பிரியங்கா மோகனின் அண்ணன் மகள் மர்ம நபர்களால் கடத்தப்படுகிறார்.
இவரின் அண்ணன் மகளை தேடும் பணியில் சிவகார்த்திகேயனும் இணைகிறார். இந்த தேடுதலில் பல திடுக்கிடும் தகவல்களும், எதிர்பாராத மர்மங்களும் சிவகார்த்திகேயனுக்கு தெரிய வருகிறது. இறுதியில் நாயகி பிரியங்கா மோகனின் அண்ணன் மகளை கடத்தியவர்கள் யார்? எதற்காக கடத்தினார்கள்? சிவகார்த்திகேயன் கடத்தல் கும்பலை கண்டுபிடித்தாரா? என்பதே படத்தின் மீதிக்கதை.
படத்தில் நாயகனாக நடித்திருக்கும் சிவகார்த்திகேயன், தன்னுடைய வழக்கமான நடிப்பு பாணியில் இருந்து விலகி வேறொரு கோணத்தில் அசத்தலான நடிப்பை கொடுத்திருக்கிறார். கலகலப்பு, காமெடி என இல்லாமல் ஆர்ப்பாட்டம் இல்லாத அமைதியான நடிப்பை வெளிப்படுத்தி இருக்கிறார் சிவகார்த்திகேயன். இவரின் புதிய முயற்சிக்கு பாராட்டுக்கள்.
நாயகியாக நடித்திருக்கும் பிரியங்கா மோகன், நல்ல அறிமுகம். அழகாக வந்து அளவான நடிப்பை கொடுத்து இருக்கிறார். வில்லனாக வினய். துப்பறிவாளன் பட அளவுக்கு இல்லையென்றாலும், பரவாயில்லை ரகத்தில் நடித்திருக்கிறார் வினய். ரெடின் கிங்ஸ்லியின் காமெடி படத்திற்கு பலம். அதே நேரத்தில் கோலமாவு கோகிலாவில் நடித்த டெம்ப்லேட் மீட்டரை தொடர்ந்திருக்கிறார் ரெடின் கிங்ஸ்லி. அர்ச்சனா, தீபா சங்கர், யோகிபாபு ஆகியோர் கொடுத்த வேலையை திறம்பட செய்து இருக்கிறார்கள்.
கோலமாவு கோகிலா பட வெற்றிக்குப் பிறகு டாக்டர் படத்தை இயக்கி இருக்கிறார் இயக்குனர் நெல்சன். வழக்கமான கடத்தல் கதை போல் இல்லாமல், வித்தியாசமாக கொடுத்திருக்கிறார். மெதுவாக நகரும் திரைக்கதை இந்த படத்தின் பலவீனம்.முதல் பாதியில் சற்று விறுவிறுப்பைக் கொடுத்தாலும், பிற்பாதியில் அந்த விறுவிறுப்பு சற்று குறைந்து கொண்டு செல்வது படத்தின் மைனஸ். கதாபாத்திரங்களை திறம்பட கையாண்டது பாராட்டுக்குரியது.
அனிருத்தின் இசை படத்திற்கு பக்க பலம். இவரது பின்னணி இசை திரைக்கதை ஓட்டத்திற்கு பெரிதும் உதவி செய்து இருக்கிறது. விஜய் கார்த்திக் கண்ணனின் ஒளிப்பதிவு சிறப்பு.
டாக்டர் - லாஜிக்கை மறந்து சிரிக்க ஒருமுறை பார்க்கலாம்
0 Comments